VNV

15. mars 2010

Félagið Landnám Ingimundar gamla er  nokkurs konar klasi um verkefnið Á slóð Vatnsdælasögu, sem unnið hefur verið að frá árinu 2003. Félagið er aðili að Samtökum um sögutengda ferðaþjónustu. Markmið verkefnisins er

• að gera Vatnsdælu skil í sínu eiginlega umhverfi, þannig að hún verði sýnileg og aðgengileg
• að stuðla að varðveislu minja tengdum sögunni og
• að kynna hana

Söguslóðin er í Vatnsdal og Þingi, og Klausturstofa á Þingeyrum gegnir mikilvægu hlutverki í verkefninu. Margir aðrir staðir koma við sögu, svo sem landnámsjörðin sjálf, Hof í Vatnsdal. Þegar er búið að merkja allnokkra sögustaði og nú nýlega kom út vandað sögukort með skýringum. Auk styrks frá Vaxtarsamningi Norðurlands vestra naut útgáfan fulltingis Menningarráðs Norðurlands vestra, Ferðamálastofu, Þjóðhátíðarsjóðs og Byggðastofnunar. Fornleifavernd ríkisins er líka dyggur stuðningsaðili verkefnisins, sem er hluti af The Heritage Maps Project, en það var styrkt af Leonardo da Vinci áætlun Evrópusambandsins. Kortið mun verða til sölu í upplýsingamiðstöðvum, bókaverslunum og víðar, en einnig má panta það á vef verkefnisins.

This e-mail address is being protected from spambots. You need JavaScript enabled to view it annaðist útgáfu sögukortsins af hálfu Landnáms Ingimundar gamla og gefur hann nánari upplýsingar. Einnig má benda á netfangið This e-mail address is being protected from spambots. You need JavaScript enabled to view it .

Þess má geta að aðalfundur Landnáms Ingimundar gamla verður haldinn í veitingahúsinu Við árbakkann á Blönduósi þriðjudaginn 23. mars nk. kl. 20:00. Að venjulegum aðalfundarstörfum loknum verður hið nýja kort kynnt. Fundurinn er öllum opinn og eru nýir félagsmenn boðnir sérstaklega velkomnir.

11. mars 2010

Eins og menn muna, bauð Landsvirkjun Vaxtarsamningi Norðurlands vestra upp á samstarf um samráðsfund í Blöndustöð í haust, í tilefni Alþjóðlegrar athafnaviku. Yfirskrift þessa fundar var Ný sóknarfæri á Norðurlandi vestra - umhverfi og afurðir. Meðal þess sem gestum fundarins varð tíðrætt um, var ferðaþjónusta sem á einhvern hátt tengist landbúnaði.

Oft vill það verða þannig að á fundum er ályktað um eitt og annað, eða tillögur eru settar niður á blað, en svo gerist lítið í framhaldinu. Á fundinum var áréttað að þar sem Vaxtarsamningurinn væri aðili að honum, væri okkur bæði ljúft og skylt að styðja við frekari úrvinnslu, eftir því sem við ætti. Nú hefur ferðamáladeild Hólaskóla, Háskólans á Hólum, tekið upp þráðinn og boðar til málþings um landbúnaðartengda ferðaþjónustu, heima á Hólum þriðjudaginn 16. mars nk. Málþingið ber yfirskriftina Landbúnaður laðar og lokkar, og dagskráin er sem hér segir:

13.00               Hlín C. Mainka Jóhannesdóttir fjallar um  landbúnaðartengda ferðaþjónustu 

13.30               Berglind Viktorsdóttir frá Ferðaþjónustu bænda:  Horft til framtíðar með tengingu við fortíðina!

14.00               Stutt hlé

14.15               Berglind Hilmarsdóttir kynnir „Opinn landbúnað“  - Verkefni á vegum Bændasamtakanna

14.45               Hlédís Sveinsdóttir frumkvöðull fjallar um tækifæri í íslenskum landbúnaði 

15.15               Kaffihlé

15.30               Vinnusmiðjur: 3 - 4 hópar safna saman hugmyndum um nýsköpun í  landbúnaðartengdri ferðaþjónustu á
Norðurlandi vestra og vinna svo að áætlun um hvernig hrinda mætti þessum hugmyndum í framkvæmd.

16.30               Kaffi og kynning á hugmyndum og áætlunum

Málþingið er öllum opið og áhugasamir eru hvattir til að fjölmenna heim í Hóla á þriðjudaginn.
Aðgangur er ókeypis, en óskað er eftir að gestir skrái sig fyrir fram, á netfangið This e-mail address is being protected from spambots. You need JavaScript enabled to view it .

Frekari upplýsingar veitir Hlín C. Mainka Jóhannesdóttir, aðjúnkt við Hólaskóla (sama netfang).
Einnig má vekja athygli á viðtali við Hlín, í þættinum Vítt og breitt á Rás eitt nú í morgun.